ஆப்கானிஸ்தானில் இன்று இடம்பெற்ற தற்கொலைக் குண்டுத் தாக்குதலில் குறைந்தபட்சம் 14 பேர் பலியாகியுள்ளதுடன், 60 பேர் காயமடைந்துள்ளனர். கிழக்கு ஆப்கானிஸ்தானின் ஹொஸ்ட் நகரிலேயே இத்தற்கொலைக் குண்டுத் தாக்குதல் இடம்பெற்றுள்ளது.

பலியானவர்களில் 3 நேட்டோப் படையினர், மொழிபெயர்ப்பாளர், பொலிஸார் அடங்குவதாக அந்நாட்டு அதிகாரிகள் தெரிவித்துள்ளனர். எந்த நாட்டைச் சேர்ந்த படையினர் பலியானார்களென்பது தொடர்பில் உறுதிப்படுத்தப்படவில்லையெனவும் தெரிவிக்கப்படுகின்றது.

படையினர் வாகனத்திலிருந்து இறங்கி வரும்வரை தாக்குதல்தாரி காத்திருந்து குண்டை வெடிக்க வைத்ததாகவும் பலியானவர்களின் எண்ணிக்கை மேலும் அதிகரிக்கலாமெனவும் ஆப்கானிஸ்தான் அதிகாரிகள் கூறியுள்ளனர்.

பாகிஸ்தானில், கடும் மின் பற்றாக்குறையால், பல பகுதிகளில், 20 மணி நேரம் மின்வெட்டு அமலில் உள்ளது. பாகிஸ்தானில், தற்போது கடும் கோடை சுட்டெரிக்கிறது. எல்லா பகுதிகளிலும், 104 டிகிரிக்கு அதிகமான வெயில் வாட்டுகிறது. கடும் மின்சார பற்றாக்குறையினால், அலுவலகங்களில் ஏ.சி., பயன்படுத்த அந்நாட்டு அரசு தடை விதித்துள்ளது. மக்கள், ஷூ அணியும் போது, சாக்ஸ் அணிய வேண்டாம் என, பாகிஸ்தான் அரசு, மக்களுக்கு அறிவுறுத்தியுள்ளது. கடந்த ஆண்டு, பாகிஸ்தானில் போதிய மழை பெய்யாததால், நீர் நிலைகள் வறண்டு கிடக்கின்றன. நீர் மின்திட்டம் தடைப்பட்டுள்ளதால், பெரும்பாலான பகுதிகளில், 20 மணி நேரம் மின்வெட்டு அமலில் உள்ளது.

அமெரிக்காவின் நியூயார்க் நகரில் இனி மேலாடை அணியாமல் சுற்றித் திரியும் பெண்களுக்கு அபராதம் விதிக்கப்பட மாட்டாது என அறிவிப்பு வெளியாகியுள்ளது. இதுவரை, மேலாடை அணியாமல் சுதந்திரமாக ஆபாசமாக சுற்றித் திரிந்த பெண்களை போலீசார் கைது செய்து அபராதம் விதிக்கும் நடைமுறை இருந்து வந்தது. இருந்தபோதும், இந்த கட்டுப்பாடு, அபராதம் இதயெல்லாம் மீறி வருடந்தோறும் ஆகஸ்ட் 21ம் தேதியன்று அமெரிக்காவின் பல நகரங்களில் மேலாடை அணியாத பல பெண்கள் பேரணி நடத்தி புரட்சியில் ஈடுபட்டு வருகின்றனர். தற்போது திடீரென, நியூயார்க் நகரில் மேலாடை அணியாமல் நடமாடலாம். அப்படி நடமாடும் பெண்கள் மீது நடவடிக்கை எடுக்க வேண்டாம் என போலீசாருக்கு அறிவுறுத்தப்பட்டுள்ளதாம்.

குவாதமாலா நாட்டின் முன்னாள் இராணுவ ஆட்சியாளர் எஃப்ரெய்ன் ரியோஸ் மோன்து இனப்படுகொலையில் ஈடுபட்டதாக குற்றங்காணப்பட்டு வழங்கப்பட்டிருந்த தீர்ப்பை அந்நாட்டின் அரசியல் சாசன நீதிமன்றம் ரத்து செய்துள்ளது. மோன்து மீது கீழ் நீதிமன்றத்தில் நடந்த வழக்கின் இறுதி வாரங்களில் வழங்கப்பட்டிருந்த சாட்சிகளை மீண்டும் விசாரிக்க வேண்டும் என இந்த நீதிமன்றம் தெரிவித்துள்ளது. 1980களில் குவாதெமாலாவில் நடந்த உள்நாட்டு யுத்தத்தில் இக்ஸில் மாயா இனக்குழுவை சேர்ந்த சுமார் 1800 பேரைக் கொல்ல உத்தரவிட்டிருந்ததாக இம்மாதத்தில் முன்னதாக மொன்து மீது குற்றங்காணப்பட்டிருந்தது.

உலகின் முன்னணி கணினி நிறுவனங்களில் ஒன்றான ஆப்பிள் தனது இலாபத்தை பல்வேறு சகோதர நிறுவனங்களுக்கும் பகிர்ந்து கணக்கு காட்டிய விதத்தில் ஆயிரம் கோடி டொலர் கணக்கில் வரி செலுத்தாமல் தப்பித்துள்ளது என அமெரிக்க செனெட் ஆய்வறிக்கை ஒன்று கண்டறிந்துள்ளது. ஆப்பிள் நிறுவனம் விதிமீறல் எதிலும் ஈடுபட்டதாக இந்த ஆய்வறிக்கை குற்றம்சாட்டவில்லை என்றாலும், ஆப்பிள் நிறுவனத்தின் இந்த துணை நிறுவனங்கள் பல வரி செலுத்துவதற்காக எந்த ஒரு நாட்டிலுமே பதியப்பட்டிருக்கவில்லை என்று ஆய்வில் தெரியவந்துள்ளது. அயர்லாந்தின் கோர்க் நகரில் பதியப்பட்டுள்ள இப்படியான ஒரு துணை நிறுவனம், கடந்த ஐந்து ஆண்டுகளாக தொழில் நிறுவனங்களுக்கான வருமான வரி என்று கடந்த ஐந்து ஆண்டுகளில் ஒரு டாலர் கூட செலுத்தியிருக்கவில்லை என்று தெரிவிக்கப்படுகிறது.

அமெரிக்காவின் ஒக்லஹோமா மாகாணத்தில் வீசிய மிகக் கடுமையான சூறாவளியில் சிக்கி 91 பேர் பலியாயினர். திங்கள்கிழமை மதியம் தாக்கிய இந்த சூறாவளியின் போது மணிக்கு 320 கிலோ மீட்டர் வேகத்தில் காற்று சுழன்றடித்தது. திடீரென இந்த சூறாவளி வலிமை அடைந்து குடியிருப்புப் பகுதிகளை தாக்கியதால், பள்ளியில் இருந்து சிறுவர்கள் பலர் உயிரிழந்தனர். உயிரிழப்பு மேலும் அதிகரிக்கக் கூடும் என்றும் அஞ்சப்படுகிறது. பல குடியிருப்புப் பகுதிகள் மொத்தமாகவே தரைமட்டமாக்கப்பட்டுள்ளன. உத்தியோகபூர்வ உயிரிழப்பு எண்ணிக்கை 51 என்றாலும், அதற்கும் மேற்பட்டு 40 பேரின் சடலங்கள் கண்டெடுக்கப்படுள்ளதாக மாநில மருத்துவ ஆய்வாளர் அலுவலகம் தெரிவிக்கிறது.

அமெரிக்காவில் வசித்து வரும் 18 வயது இந்தியப் பெண்ணான ஈஷா காரே 20 நொடிகளில் செல்போனை சார்ஜ் செய்யும் கருவியைக் கண்டுபிடித்துள்ளார். அமெரிக்காவின் கலிபோர்னியா மாகாணம், சரடோகா பகுதியில் வசிப்பவர் ஈஷா காரே. இவர், செல்போன் பேட்டரியில் பொருத்தக் கூடிய சிறிய சாதனத்தைக் கண்டுபிடித்ததற்காக இண்டெல் நிறுவனத்தின் இளம் விஞ்ஞானி விருது வழங்கிக் கௌரவிக்கப்பட்டுள்ளார். சூப்பர் கெபாசிட்டர் என்று அழைக்கப்படும் இந்தச் சிறிய சாதனம், 20 முதல் 30 நொடிகளில் செல்போன் பேட்டரியில் மின்சாரத்தை சேமித்துக் கொள்ள உதவுகிறது. அவ்வாறு சார்ஜ் செய்யப்படும் மின்சாரம் பல மணிநேரங்களுக்குப் பயன்படுகிறது.

நிலக்கண்ணிவெடிகளை கண்டுபிடிக்க, தேனீக்களுக்கு பயிற்சி அளிக்கும் முயற்சியில், குரோஷிய ஆராய்ச்சியாளர்கள் ஈடுபட்டுள்ளனர். ஐரோப்பிய நாடான குரோஷியாவிற்கும், செர்பிய கிளர்ச்சியாளர்களுக்கும் இடையே, 1991ல் நடந்த போரின்போது, ஏறக்குறைய, 10 ஆயிரத்துக்கும் மேற்பட்டோர் கொல்லப்பட்டனர். மேலும், கண்ணிவெடியில் சிக்கி, 2,500க்கும் மேற்பட்டோர் பலியாயினர். இந்த சண்டையின்போது, 90 ஆயிரத்துக்கும் மேற்பட்ட கண்ணிவெடிகள் புதைத்து வைத்திருந்தது தெரியவந்தது. இந்தக் கண்ணிவெடிகளை கண்டுபிடிக்க, தேனீக்களை பயன்படுத்த, குரோஷிய ஆராய்ச்சியாளர்கள் முடிவு செய்துள்ளனர்.

அமெரிக்க முன்னாள் வெளியுறவு செயலாளர் ஹிலாரி கிளிண்டனை பிறப்பிறுப்பில் சுட்டு சித்ரவதை செய்து கொல்ல வேண்டும் என ஆபாசமாக விமர்சித்ததன் மூலம் பிரச்சனையில் சிக்கியுள்ளார் வானொலி நிகழ்ச்சி தொகுப்பாளர் ஒருவர். அமெரிக்க வானொலி ஒன்றில் நிகழ்ச்சித் தயாரிப்பாளராக பணியாற்றி வருபவர் பிட்டே சாண்டில்லி. இவர் ஒரு நிகழ்ச்சியின் போது ஹிலாரி கிளிண்டனை குறித்து தவறான கருத்துக்களைக் கூறியுள்ளார். கடந்த ஆண்டு நடத்தப்பட்ட லிபியாவின் பென்காசியில் உள்ள அமெரிக்க தூதரக தாக்குதலுக்கு காரணம் ஹிலாரி கிளிண்டனின் தவறான அணுகுமுறை தான் என தன்னிலை விளக்கம் வேறு கூறியுள்ளார் வானொலி நிகழ்ச்சி தொகுப்பாளர் பிட்டே சாண்டில்லி.

மியான்மர் அதிபர் தெய்ன் சீன், அமெரிக்காவின் வெள்ளை மாளிகைக்கு வருகை புரிந்துள்ளார். மியான்மரில் ராணு ஆட்சி நடைபெற்றதால் கடந்த ஆண்டு செப்டம்பர் மாதம் வரை அந்நாட்டு அதிபருக்கு அமெரிக்காவில் நுழைய தடை விதிக்கப்பட்டிருந்தது. அங்கு ஜனநாயக ஆட்சி ஏற்பட்டதையடுத்து அந்த தடை நீக்கப்பட்டது. இந்நிலையில் கடந்த ஆண்டு நவம்பர் மாதம் மியான்மருக்கு சென்றிருந்த அமெரிக்க அதிபர் ஒபாமா, மியான்மர் அதிபரை அமெரிக்காவுக்கு வருமாறு அழைப்பு விடுத்திருந்தார். அவரது அழைப்பை ஏற்ற தெய்ன் சீன், அமெரிக்காவின் வெள்ளை மாளிகைக்கு சென்றார்.

துருக்கி நாட்டில் கப்படோசியா மலைகள் சுற்றுலா முக்கியத்துவம் வாய்ந்த பகுதிகளாக விளங்குகின்றன. இங்கு கூம்பு வடிவில் ஏராளமான பாறைகள் பல்லாயிரம் கிலோ மீட்டர் பரப்பளவுக்கு பரந்து விரிந்துள்ளன. அந்த பாறைகளை குடைந்து பல நகரங்கள் அமைக்கப்பட்டுள்ளன. இப்பகுதியை சுற்றிப் பார்ப்பதற்காக பயணிகளுடன் வந்த 2 பலூன்கள் நேற்று ஒன்றோடு ஒன்று மோதிக்கொண்டன. இதனால் பலூன்கள் கிழிந்து நிலை தடுமாறி கீழே விழுந்தன. இதில் பிரேசில் நாட்டைச் சேர்ந்த ஒரு சுற்றுலா பயணி இறந்தார். ஸ்பெயின் நாட்டைச் சேர்ந்த ஒருவர் மருத்துவமனையில் சிகிச்சைக்கு சேர்க்கப்பட்டு அங்கு இறந்தார்.

அமெரிக்க லாட்டரியில் 590.5 மில்லியன் டொலர் (3000 கோடி இந்திய ரூபா) ஜெயித்த அந்த அதிர்ஷ்டசாலி யார் என காண உலக மக்கள் ஆவலுடன் உள்ளனர். இதுவரை இல்லாத அளவு அமெரிக்க லாட்டரி வரலாற்றிலேயே முதல்முறையாக மிகப்பெரிய தொகையான 590.5 மில்லியன் டொலருக்கு, பவர்பால் லாட்டரி சீட்டுகள் விற்பனை செய்யப்பட்டன. இதன் குலுக்கல் முடிவுகள் நேற்று இரவு அறிவிக்கப்பட்டன. குறிப்பிட்ட இந்த லாட்டாரி சீட்டை புளோரிடா மாகாண செப்ரில்ஸ் நகரை சேர்ந்த ஒருவர் வாங்கியிருப்பதாக தகவல் தெரியவந்துள்ளது. ஆனால், இவ்வளவு பெரிய தொகையை ஜெயித்த அந்த அதிர்ஷ்டசாலி யார் என்று தெரிந்து கொள்ளும் ஆவலில் இருப்பதாக மக்கள் தெரிவித்துள்ளனர்.

பிளாக்கிங் செய்ய உதவும் டம்ப்ளர் இணையத்தளத்தை யாகூ நிறுவனம் 1.1 பில்லியன் டொலருக்கு வாங்க இணங்கியுள்ளது. இன்டர்நெட்டில் 18 முதல் 24 வயதினரிடையே மிகப் பிரபலமாக உள்ள பிளாக்கிங் இணையத்தளமான டம்ப்ளரை வாங்குவதன் மூலம் இளம் வயதினரை ஈர்க்க யாகூ திட்டமிட்டுள்ளது. 2007ம் ஆண்டு நிறுவப்பட்ட டம்ப்ளர் இணையத்தளத்தில் 107 மில்லியன் பிளாக்குகள் உள்ளன.12 மொழிகளில் ஆன இந்த இணையத்தில் 50 பில்லியன் தகவல்கள் இடம்பெற்றுள்ளன. இந்த நிதியாண்டின் முதல் காலாண்டில் 13 மில்லியன் டொலர்கள் வருவாய் ஈட்டியுள்ள இந்த நிறுவனம் இந்த ஆண்டில் 100 மில்லியன் டொலர்களை ஈட்ட இலக்கு நிர்ணயித்துள்ளது. வெறும் 175 ஊழியர்களைக் கொண்டு இந்த இணையத்தளம் இந்த சாதனையைச் செய்துள்ளது. இந்நிலையில் இதை வாங்க யாகூ திட்டமிட்டுள்ளது.

இந்தியா வந்துள்ள சீனப் பிரதமர் - இந்திய பிரதமர் மற்றும் முக்கியத் துறை அதிகாரிகளுக்கு இடையேயான பேச்சுவார்த்தையின் முடிவில், இரு நாடுகளுக்கும் இடையே 8 ஒப்பந்தங்கள் கெயெழுத்தாகியுள்ளன.இரு நாட்டு தலைவர்களுடனான சந்திப்பின் போது, சீனப் பிரதமர் தனது முதல் சுற்றுப் பயணமாக இந்தியா வந்ததற்கு நன்றி தெரிவித்தார். மேலும், இந்திய உள்ளட்டமைப்பில் சீனாவின் முதலீட்டை எதிர்பார்ப்பதாகவும் தெரிவித்தார்.மேலும், சீன உற்பத்திப் பொருட்களுக்கு மிகச் சிறந்த சந்தையாக இந்தியா விளங்கவதாக சீனப் பிரதமர் தெரிவித்துள்ளார்.

ஈராக்கின் தலைநகர் பாக்தாத் மற்றும் பாஸ்ரா நகரப் பகுதிகளில் நடந்த தொடர் கார்குண்டு தாக்குதல்களில் குறைந்தது 40 பேர் பலியாகியுள்ளனர். இன்று பாக்தாத்தில் ஷியா முஸ்லிம்கள் வாழும் பகுதிகளில் 9 இடங்களில் கார்க்குண்டுகள் வெடித்தன. இதில் 27 பேர் கொல்லப்பட்டதுடன் 116 பேர் காயமடைந்தனர். அதேவேளை ஈராக்கின் வடக்கு மற்றும் கிழக்கு பகுதிகளில் நிகழ்ந்த இரு குண்டுத்தாக்குதல்களில் 7 பேர் கொல்லப்பட்டனர். பாஸ்ரா நகரப் பகுதியில், பேருந்து நிலையம் மற்றும் விடுதியருகே இரண்டு கார் குண்டுகள் வெடித்ததில் 13 பேர் கொல்லப்பட்டதுடன் 40 பேர் காயமடைந்தனர்.

குறுகிய தூர இலக்கை குறி வைத்து தாக்கவல்ல ஏவுகணையை வட கொரியா இன்று வெற்றிகரமாக சோதித்துள்ளது. ஜப்பான் கடற்கரைப் பகுதியில் ஏவுகணைச் சோதனை தளத்தில் இன்று நடத்தப்பட்ட ஏவுகணை சோதனைக்கு தென் கொரியா தலைவர்களும் ஐநா பொதுச் செயலாளர் பான் கி மூனும் கண்டனம் தெரிவித்துள்ளனர். கடந்த மூன்று நாட்களில், வடகொரியா நடத்தியுள்ள 6வது ஏவுகணைச் சோதனை இது என்பது குறிப்பிடத்தக்கது. ஐ.நாவினதும் அமெரிக்கா போன்ற நாடுகளின் எச்சரிக்கைகளையும் மீறி வடகொரியா ஏவுகணைச் சோதனைகளை நடத்தி வருகிறது.

சீனப் பிரதமர் லீ கெகியாங்கின் இந்திய சுற்றுப் பயணத்துக்கு எதிர்ப்புத் தெரிவித்து இரு நாள்களுக்கு தொடர் போராட்டங்களை நடத்த இருப்பதாக திபெத் அமைப்புகள் அறிவித்துள்ளன. இதையடுத்து தில்லியில் போலீஸார் பாதுகாப்பை அதிகரித்துள்ளனர். லீ கெகியாங் தங்கியுள்ள ஹோட்டல், சீன தூதரகத்தில் கூடுதல் பாதுகாப்பு ஏற்பாடுகள் செய்யப்பட்டுள்ளன. தில்லி மெட்ரோ ரயில் நிலையம் அருகே திபெத்தியர்கள் போராட்டம் நடத்த வாய்ப்பு உள்ளதால், திங்கள்கிழமை காலை 8 முதல் 10 மணி வரை 4 மெட்ரோ ரயில் நிலையங்களும் மூடப்படுகின்றன. லீ கெகியாங், அவருடன் வந்துள்ள குழுவினரின் பயணத்திட்டங்களுக்கு ஏற்ப போக்குவரத்து மாற்றங்களும் செய்யப்பட்டுள்ளன.

தபால் துறை ஊழியர்கள் நாய் கடியால் பாதிக்கப்படுவது லொஸ்ஏஞ்சல்ஸ் நகரில்தான் அதிகம் என்று தெரிய வந்துள்ளது.நாய்கள் ஜாக்கிரதை எச்சரிக்கை பலகை உலகளவில் பல வீடுகள், பங்களாக்களில் வைக்கப்படுகின்றன. தெரிந்தவர்களை, நன்றாக பழகியவர்களையே பல வேளைகளில் செல்ல நாய்கள் கடித்து வைக்கின்றன. அப்படி இருக்கும் போது, அரசு சீருடையில் வருபவர்களை பார்த்ததும் சும்மா இருக்குமா? குறிப்பாக நாய்களால் அதிகம் பாதிக்கப்படுவது தபால் துறை ஊழியர்கள்தான் என்று தகவல் வெளியாகி உள்ளது. இதுகுறித்து அமெரிக்க தபால் துறை சேவை செய்தி தொடர்பாளர் ஈவா ஜேக்சன் வெளியிட்ட அறிக்கையில் கூறியிருப்பதாவது:

எல்லைப் பகுதியில் அமைதி குலைந்தால் இருதரப்பு உறவு பாதிக்கும் என சீன பிரதமர் லீ கெகியாங்கிடம் பிரதமர் மன்மோகன் சிங் கண்டிப்புடன் கூறியுள்ளார். சீனப் பிரதமராகப் பொறுப்பேற்ற பின், லீ கெகியாங் முதல் வெளிநாட்டுப் பயணமாக தில்லி வந்தடைந்தார். மூன்று நாள் பயணமாக வந்துள்ள அவர் ஞாயிற்றுக்கிழமை இரவு பிரதமர் மன்மோகன் சிங்கை அவரது இல்லத்தில் சந்தித்துப் பேசினார். சுமார் ஒரு மணி நேரம் நடைபெற்ற இந்த சந்திப்பின்போது, ஜம்மு காஷ்மீர் மாநிலம் லடாக் பகுதியில் கடந்த மாதம் சீன ராணுவம் இந்திய எல்லைக்குள் ஊடுருவியது குறித்த தனது கவலையை பிரதமர் மன்மோகன்சிங் தெரிவித்தார்.

விண்கல் மோதியதில் நிலவில் பெரும் பள்ளம் ஏற்பட்டுள்ளதாக அமெரிக்க விண்வெளி ஆய்வு அமைப்பான நாசா தெரிவித்துள்ளது. "சிறிய அளவிலான பாறை போன்ற விண்கல் கடந்த மார்ச் 17-ம் தேதி நிலவில் மோதியது. அப்போது, இதுவரை பார்த்திராத அளவுக்கு அதிகளவு வெளிச்சம் உண்டானது' என்று விண்கற்கள் ஆராய்ச்சியாளர் பில் குக் தெரிவித்தார். நிலவில் மோதிய விண்கல் 40 கிலோ அளவுக்கு எடை கொண்டதாகவும், 0.3 முதல் 0.4 மீட்டர் நீளம் கொண்டதாகவும் இருந்தது. அது, மணிக்கு 90123 கிலோ மீட்டர் வேகத்தில் சென்றதாகவும் தெரிவிக்கப்பட்டுள்ளது.

ரஷ்யா அனுப்பிய விண்கலத்தில் சென்ற எலி, பல்லி, நத்தை போன்றவை, நேற்று, பாதுகாப்புடன் பூமிக்குத் திரும்பின. செவ்வாய் கிரகத்தில் மனிதன் வாழ்வதற்குரிய சூழல் உள்ளதாக, விஞ்ஞானிகள் நம்புகின்றனர். இதற்கான ஆய்வுகளில் பல நாடுகள் ஈடுபட்டு உள்ளன. செவ்வாய் கிரகத்தில் மனிதர்களை குடியேற்றும் நடவடிக்கையிலும், சில தனியார் நிறுவனங்கள் ஈடுபட்டு உள்ளன. செவ்வாய் கிரகத்தின் சூழல், உயிரினங்களுக்கு எந்த வகையில் உடலில் மாற்றத்தை ஏற்படுத்தும் என்பதைக கண்டறிவதற்காக, ரஷ்ய விஞ்ஞானிகள், சுண்டெலி, நத்தை, பல்லி உள்ளிட்ட உயிரினங்களை, பயோன்-எம் விண்கலம் மூலம், கடந்த மாதம், விண்வெளிக்கு அனுப்பினர். இந்த விண்கலம், ரஷ்யாவின், ஓரன்பர்க் நகரில் நேற்று பாதுகாப்பாக தரை இறங்கியது.